Frontoi barruan: poltsak, arropak, bitxiak, egurrezko jostailuak, motxilak, ilustrazioak, xaboiak... eskuragarri. Sorginak Emakume Taldeko kideak ere bertan izango dira, eta, oraingoan, 30 kilo arto irin, hamar kilo txistorra eta hamar kilo hirugihar eramango dituzte talo goxoak prestatzeko. Frontoi kanpoan, berriz, bi postu izango dira; batean, eztia izango da; eta, bestean, azken urteotan moduan, piper erreak.
Egurrean pirografiatuz
Salmenta postu horiez guztiez gain, tailerra ere izango da Ion Dufurrenaren eskutik. Sei urtetik gorakoentzat, egurrarekin tailerra izango da. Honela azaldu du Aiora Elkorobarrutiak, Leintz Gatzagako Kultura zinegotziak: "Tailer herrikoia izango da; lehenengo, egur zati bat hartu eta lixatuko dute, eta, gero, norberak bere izena edo testu labur bat idatzi. Ez da izenik eman behar".
Berrikuntza gisa, bisitak
Artisau azokako postuez gain, herriguneko bisita gidatuak izango dira. Hiru bisita izango dira, guztira: 12:30ean, euskaraz; 13:00etan gazteleraz; eta 13:30ean, haurrentzat soilik izango dena. "San Milixan egunean zenbait postal jarriko ditugu bisita gidatuen informazioarekin, hala jendea animatzeko…", adierazi du Elkorobarrutiak.
Bertara joateko Gatz Bidea Takarraran taldekoek ere egin dute hitzordua egunerako. Arrasate eta Gatzaga arteko ibilbidea egingo dute, azken urteotan moduan. Hala ere, autobus zerbitzu berezia ere egongo dela adierazi dute Udaletik.