"Ahalik eta haur gehien batzea zen gure asmoa, eta horregatik ospatu genuen Gaba Baltza joan den egubakoitzean. Izan ere, martitzenean, zenbait haurrek huts egingo zutela adierazi ziguten, eta denok ez ginenez egongo, hala egitea erabaki genuen. Aurpegiak margotu eta kalean beldurra ematen aritu ziren gaztetxoak. Ederto pasa zuten. Gero, egunean batutako haurrei talde argazkia atera genien Gatzagako iturrian, eta, amaitzeko, afari-merienda egin genuen", adierazi du Ainhoa Barandiaranek, Leintz Gatzagako Gurel Guraso Elkarteko kideak.
Egutegiko erretratuetarako deia
Azaroaren 11n, gatzagarrak batu nahi ditu Udalak 2024ko egutegiko erretratuak ateratzeko. Urtero etxez etxe banatzen dute egutegia, eta, aurten, ahalik eta herritar gehien batuta, talde argazkia ateratzea da asmoa, lehenengo argazkirako. Bestetik, herriko lau gazteenak eta lau nagusienak batzea eta horiei ere erretratua ateratzea da asmoa, hala, bigarren argazkia ateratzeko. Bi horiekin osatuko dute 2024ko Gatzagako egutegia. Deialdia azaroaren 11rako egin dute; 17:00etan, plazan. Ondoren, 19:00etan, pintxo-potea egingo dute.
