Bihar, eguena, Gatz Museoa familian bisita gidatua izango da. 12:00etan, euskarazko saioa izango da, eta, 13:00etan, berriz, gaztelerazkoa. "Bisita gidatu bakoitzeko pertsona kopuru muga 20 lagunekoa da, eta oraindik lekua dago izena emateko. Azpimarratu beharra dago haurrak helduekin lagunduta joan behar direla", adierazi dute Debagoieneko Mankomunitateko Turismo Saileko teknikariek.
Gatzagako gatzaren historia
Ordubete irauten duten azalpenek duela milioika urte sortutako gatz-iturburuaren sorrera dute abiapuntu. Handik sortu zen, Burdin Aroan, gatza ateratzeko jarduera ekonomikoa, 1972ra arte iraun zuena. Museoan antzinako prozedura horren berri emango dute, Santa Kolunba ermita, gatz fabrika, lixiba fabrika eta XVIII. mendeko dorlak erakutsita.
Izena emateko bideak
Izena ematea beharrezkoa da. Hori horrela, infoturismo@debagoiena.eus helbidera idatzi edo 943 79 64 63 telefono zenbakira deitu beharko da. Horrekin batera, informazio gehiago nahi duenak edo bailako gainontzeko proposamenen berri jaso nahi duenak Turismodebagoiena.eus webgunean ikus ditzake urriko zubirako plan ezberdinak.
