Ekintzaren berri jakin bezain pronto, Goienara oharra bidali dute Gatzagako Udaletik, eta Dorleta Elkorobarrutia Leintz Gatzagako alkateak ekintza txalotu du; honakoa adierazi du: "Azkenaldian, kalean entzun izan da txakur kakak direla-eta zerbait pentsa beharrean gaudela…, eta norbaitek pentsa eta egin!. Labidean, etxean egindako zakarrontzi bat eskegi du". Horren baitan, gaia bera herrian bolo-bolo ari dela, eta jarri duena nor izan daitekeen apustuak ere hasi direla ziurtatu du Elkorobarrutiak. "Txakurrarekin sarri pasioan hortik ibiltzen den herritar batek jarri duela ziurtatu digute…".
Ekintza txikien eragina
Zakarrontzia nork jarri duen alde batera utzita, txakur kakak batzeko zakarrontzia jartzeak zer pentsa ekarri diela adierazi dute Leintz Gatzagako udal ordezkariek: "Ekintza txikiek eragin handia izan dezakete; txakur jabe denek ez dute modu berean jarduten, eta Gatzagako Udalak ere txoko garbiak eskatzeko baliabideak jarri beharko ditu. Udalekoon partez, beraz, mezua jasota! Zakarrontziak jarriko ditugu. Iradokizun bat helarazteko bide original eta efektiboa izan da".
