Batez ere, egun horretan herriko nagusiak alaitzeko asmoz antolatu dute ekimena, eta, bide batez, parte hartzen dutenek ondo pasatzeko asmoz.
Hilaren 24an, 08:45ean batuko dira Gabon kantak abestera joan nahi dutenak Gatzagako udaletxe aurrean, eta autobusa hartuko dute baserririk baserri joateko. Aurreikusitako baserri guztietatik pasatzen direnean, berriz, herrigunera bueltatuko dira, eta herriko kaleetan zehar kantuan aritzeko tartea hartuko dute. "Gutxi gorabehera, 31 baserritatik pasatuko gara abestera; Olentzero, Kalera kalera, Horra Mari Domingi, Ole Olentzero… kantak izango dira abestuko ditugunak, eta 30 lagun inguru arituko gara horretan", adierazi du Ainhoa Barandiaranek, Gatzagako Gurel Guraso Elkarteko kideak.
