Monumentu gisa jarri dute enborra, Gatz Museotik gertu, hitzez ekiteko garaia dela adierazteko Gatz Bidea egiten duen pertsona orori. Modu horretan, Labidea, Gatz Museoa, Arrate jatetxea, Gatzagako Udala, Sormen Design, Gure Ametsa, Sorginak Emakume taldea eta Gaztainuzketa mendi etxeak Euskaraldiko ariketa sozialean arigune diren neurrian, Gatz Bidea ere, nolabait, euskaraz lasai aritzeko gune bihurtu dute.
Domeka eguerdian egin zuten ekitaldian ezarri zuten gaztainondo-enborra, eta argazkietan jaso dute prozesu osoa; ihartutako enborra jasotzetik enborrean mezua idaztera bitarteko urrats guztiak erretratatu dituzte.
Gaur, triki pintxo-potea
Euskaraldiaren ekintzak amaitzeko, gaur, 18:30etik 20:00etara bitartean, triki pintxo-potea egingo dute Euskaraldiko batzordekideek, Arratek, Toki-Ederrek eta Labideak lagunduta.
