'Sanmilixan, ardikixa jan eta aketeixan': jai giroa domekan

2019an ere prestatu zituzten piper erreak sanmilixanetan.

Sanmilixanak ospatzeko artisau azoka izango da domeka honetan, Leintz Gatzagan, eta pilotalekuan hamabost postu jarriko dituzte orotariko produktuekin.

Esaerak dioen moduan, Sanmilixan, ardikixa jan eta aketeixan. Ardi-okela janez, agian, ez dituzte ospatuko sanmilixenak domeka honetan Gatzagan. Hala ere, itzulipurdika, jauzika edo aketeixan aritzeko arrazoiak soberan izango dituzte egunerako prestatu duten artisau azokako postuetan izango direnak ikusteko.

Artisau azokan orotariko produktuak izango dira, urtero moduan, eta aurtengoa 28. edizioa izango da. Guztira, hamabost postu jarriko dituzte, eta horietan bitxigintza, saskigintza, larrugintza, poltsak, erlojuak, arropagintza, taloak eta piper erretze erakustaldia izango dira, besteak beste.

Piper erreak probatzeko aukera

Azpimarratzeko postu bat izango dela ere adierazi dute antolatzaileek: "Postu berezi gisa, Lizarratik piperrak erretzen eta saltzen izango dira zenbait lagun. Gatzagatik jende dezente joaten da haiengana produktuak erostera, eta, guk etortzeko eskatuta, domekako azokan izango dira. Pikillo piperrak eta najeranoak ekarriko dituzte, baina baita bestelako produktuak ere. Gainera, Gatzagako gatzarekin prestatuko dituzte piper erreak, bertaratzen direnek probatzeko".

Horrekin batera, Sorginak Emakume Taldekoak taloak egiten arituko dira, urtero moduan. "40 kilo irin enkargatu ditugu taloetarako, eta barruan sartzeko, iaz moduan, 37 kilo hirugihar eta 37 kilo txistor. Egunean bertan hamabost lagun inguru izango gara lanean. Batzuk, taloak egiten; beste batzuk, plantxan, hainbat txistor eta hirugihar egiten; eta gainontzekoak, zerbitzatzen".

Erlazionatuak

San Milixan jaiengatik, autobus zerbitzu guztiak aurrez eskatu gabe egingo dira

Leintz Gatzaga

Domekan, azaroaren 13an, sanmilixanak ospatzeko azoka egingo dutenez, Leintz Gatzagan, DG21E linearen zerbitzu guztiak aurrez eskatu gabe egingo di...

ALBISTEAK MUGIKORREAN

Debagoieneko albiste nabarmenenak eta azken ordukoak Whatsapp edo Telegram bidez jaso gura dituzu? Harpidetu zaitez doan!

WHATSAPP: Bidali ALTA 688 69 00 07 telefono zenbakira –Whatsapp bidez–.

TELEGRAM: Batu zaitez @GoienaAlbisteak kanalera.