Gatzagako Udaleko lanpostu zerrendaren aldaketaren hasierako onarpena egin dute gaurko osoko bilkuran, eta horren arrazoia izan da udal langile batek erretiroa hartuko duela: "Bi emakume ditugu Udaleko administrazioan lanean, Josune eta Marijo, eta Marijok erretiroa hartuko duenez, beste pertsona bat beharko dugu, hark egiten duen lana egiteko", adierazi du Juanito Bengoa Gatzagako zinegotziak.
Mendi-etxeak hizpide
Horrekin batera, Gaztainuzketako mendi-etxeak ere izan zituzten atzoko osoko bilkuran berbagai. Izan ere, Gaztainuzketako apartamentu turistikoen konplexua kudeatzeko esleipena egin dute, eta aho batez onartu dute udal ordezkariek. "Gaizka Perez Aretxabaletako mutil gazte bat da, eta LEINNeko ikasketak egin ditu Oñatin, enpresa bat martxan jartzeko asmoz. Hura izango da Gaztainuzketako mendi-etxeak kudeatuko dituena, eta, gauza bereziren bat ez bada gertatzen, hark eramango du zerbitzua. Itxura ona hartu diogu; alegia, aholkulari oso onak ditu, eta gure konfiantza osoa du. Hori horrela, uztailaren 1ean martxan jarriko da. Apurka-apurka mendi-etxe batzuetan hobekuntzak egingo ditu, eta aurrera begira taberna zerbitzua irekitzeko asmoa ere badu. Hala ere, azken honi erreparatuz, aurten, behintzat, ez duela irekiko taberna aurreikusten du", Bengoak adierazi duenez.