Leintz Gatzagako Udalak, herriko beste hainbat eragilerekin elkarlanean, Aratusteak ospatzeko egitaraua prestatu du otsailaren 26rako, zapatua. Eguneko hitzordu azpimarragarriena 11:30ean izango da, eta, bereziki, haurrei zuzenduta dago. Hain zuzen ere, Arrasateko Txatxilipurdi elkarteko kideek zirku tailerra eskainiko dute, eta bertan, zirkuko hainbat diziplina ikusteko eta ikasteko aukera izango dute bertaratzen direnek; besteak beste, malabarrak, oreka...
Horrekin batera, pintxo lehiaketa irekia ere izango da, eta parte hartu nahi duenak pintxo bat egin eta zortzi ale eraman beharko ditu lehiaketara. Epai-mahaia bi herritarrek osatuko dute. Goizeko ekitaldi horiek musikarekin girotuta egongo direla nabarmendu dute antolatzaileek.
Korrika batzordearen postua
Herriko Plazan hainbat ekintza egongo direla aprobetxatuta, Korrikako materiala saltzen izango dira Gatzagako Korrika batzordeko kideak.
