Gatzagako udaleku irekiak uztailaren 5ean hasiko dituzte, eta hilaren 16ra bitartean hamar haur arituko direla adierazi dute antolatzaileek. Goizez 11:00etatik 13:00etara bitartean eta arratsaldez 15:00etatik 17:00etara, astegunetan. Egubakoitzetan, baina, goizeko ordutegia soilik izango da.
Uztailaren 26tik 28ra bitartean, berriz, udaleku itxiak egingo dituzte, eta horietan zortzi haurrek eman dute izena. Udaleku irekietan zein itxietan, Jon Egidazu eta Miren Antxia begiraleen gidaritzapean egongo dira haurrak.
Irteerei garrantzia
Udaleku itxietan, Garaion Sorgingunean pasatuko dituzte egunak haurrek, baina herrigunean izango diren udaleku irekien bueltan ere garrantzi handia eman diete irteerei. Hori horrela, martitzenetan eta eguenetan irteerak egitea aurreikusi dute. Hala ere, egun horietarako programatuta dituzten jarduerak eguraldiaren arabera moldatu egingo dituztela aurreratu dute.
