Asmoa da Labidea dendaren alboan Pilar kalera ematen duen tunelean, margolan bat egitea auzolanean, herria apaintzeko; eta, horretarako, batez ere, haurrak animatu nahi dituzte antolatzaileek parte hartzera. Oraingoz, hamabik eman dute izena, eta parte hartu gura dutenek bost euro ordaindu beharko dute.
Muralismo tailerreko egitaraua
Muralismo tailerra hiru zapatu arratsaldetan egingo den arren, bi fase izango ditu: batetik, arlo teorikoa, zapatu honetan egingo dutena; eta bestea, praktikoa, hurrengo bi zapatuetan egingo dutena. Hala, izena ematen dutenak bozetoa eraikitzeko batuko dira ekainaren 5ean, 17:00etan, kultura etxean. Ekainaren 12an, 17:00etan, berriz, behin ideia pentsatuta dutela, margolana egiten hasiko dira, eta, hitzordu horretan, murala bera nola egin behar den irakatsiko diete parte hartzen dutenei, muralari forma ematen hasteaz batera. Amaitzeko, ekainaren 19an, azken ukituak egiteko batuko dira; hala, lana amaituko dute, 17:00etan elkartuta.
Murala egiteko pautak
POOK sormen laborategia elkarteko kideak izango dira muralismo tailerrean arituko diren neska-mutikoei egin beharrekoak zehazten. Gidari lanetan aritzeaz batera, halako artelanak egiteko irakaspenak ere eskainiko dizkie tailerrean batzen direnei.