Lore berriak sartzeaz batera, pertsonaien baitan, herriko kontuei erreferentzia egiten dizkieten istorioak idatziko dituzte loreontzien alboan jarriko dituzten teiletan, harri-multzoz inguratuta. Hala adierazi du Ainhoa Barandiaran gatzagarrak: "Loreontzietarako loreak Buart loradendakoek ekarriko dizkigute, doan. Prestatu egin behar ditu, eta berak esango digu zeintzuk diren jartzeko egokienak, baina, lore iraunkorrak badira, askoz hobeto. Hala, eskerrak eman nahi dizkiogu Buart loredandari, herri ekimen honetan bere alea jartzeagatik. Gu lekua atondu eta loreak zaintzeaz arduratuko gara".
Guztira, hamaika loreontzi daude pertsonaia bihurtuta, eta guztiak loreekin beteta herria koloreztatzea da asmoa. Hamaika loreontzi izanda, hamaika istorio ere kontatuko dituzte.
Herriko kontuak
Herrian zehar dauden loreontzien pertsonaiek izena dute, eta herriko txokoei egiten diete erreferentzia. "Bi loreontzi ditugu, esaterako, Jarindo eta Deba izena dutenak. Deba ibaiari erreferentzia eginez, Hiruerreketan hasten dela Deba adieraziko dugu, adibidez. Zer jarri pentsatzen ari gara egunotan, ea datorren asterako prest dugun…".
