Ludotekako haur gazteena 3 urtekoa da eta nagusiena, berriz, 8 urtekoa, eta astean behin ordu eta erdiz, 17:30etik 19:00etara, soilik batzen diren arren, ahal duten denbora guztia aprobetxatzen dute jolas eta ekintza ezberdinak egiteko.
Eskulanak egiten aritu dira
"Negu garaian, batez ere, ludoteka barruan egiten ditugu ekintza guztiak. Txotxongiloak egiten aritu izan gara, bizkotxoak ere egin ditugu… Aste honetan, berriz, eskulanak egiteko eguna izan dugu. Puxikak eta arrozarekin egindako malabarrak, soka batekin lotuta dagoen pilota basora sartzean datzan jolasa… egin ditugu, besteak beste. Amaieran, berriz, ohiturari jarraituz, marrazkiak eta mahai-jolasak izan ditugu, eguna borobiltzeko", adierazi du Miren Zubillagak, ludotekako hezitzaileak.
Mozorrotuta, antzezlanak
Aste batetik besterako saioak prestatuta izaten dituzten arren, askotan egitaraua jarraitzea ez dela samurra adierazi du Zubillagak: "Datorren asteko plana antzezlan bat egitea izango da, eta, horretarako, haurrek mozorro ezberdinak erabiliko dituzte… Hori da hasiera bateko asmoa, baina ea eguna iristean egiteko gogoa duten. Hala ere, egiten ditugun ekintzekin gustura ari direla esango nuke. Dena den, eguraldi hobea egiteko gogoz gaude, hala, kalera atera eta aire libreko jolasak egiteko".