Joan den eguenean egindako osoko bilkuran, datorren urtean ordaindu beharreko zergak eta tasak izan zituzten aztergai Leintz Gatzagako udalbatzako kideek. Orokorrean, zerga eta tasa guztiak izoztea erabaki zuten, aho batez, 2021era begirako Ordenantza Fiskalen hasierako onarpenean. Hala ere, salbuespen gisa, zerga bakarra igotzea adostu zuten. Hain zuzen ere, hiri hondakinena, %5 igoko dutena. "Leintz Gatzagako kasuan, gaur egun udalbatza osatzen dugun kideon agintaldia beranduago hasi zen, eta gure aurretik egon zen udal taldeak ezin izan zituen zaborren tasak igo. Hala, oraingoan, %5 igotzea erabaki dugu. Beste tasa eta zerga guztiak, berriz, izoztuta geratu dira", adierazi du Eugenio Otsoak, Leintz Gatzagako alkateak.
Astelehen honetan Gatzagako zergen eta tasen Ordenantza Fiskalak Gipuzkoako Aldizkari Ofizialean argitaratuta, alegazioak aurkezteko epea 30 lanegunekoa izango da.
