Arduraz jokatzeko unea dela argudiatuz, joan den astean udalbatzako kideek egindako bileran Leintz Gatzagako Andramari jaiak ez egitea erabaki zuten. Hala ere, irailaren 8an egongo da meza, 12:00etan, Dorleta Santutegian, eta herritarrentzat soilik zuzenduta egongo den ekitaldi sinbolikoren bat egitea ere ez dute baztertzen, herrigunean.
"Andramari egunean egingo dugu, goizean, herrigunean, gatzagarrentzat ekitaldi sinbolikoren bat. Hala ere, zer egin aztertzen ari gara, baina Andramari eguna dela adierazteko soilik izango da; ezer berezirik egin gabe. Ez genuke nahi, gainera, beste herrietako jendea gerturatzerik; beraz, hala ospatu beharko ditugu aurten. Urteetan etorri izan diren Otxandioko lagunak ez dira etorriko jaietara, eta sumatuko da hori herrian. Bola-jokoa ere ez da izango, kontzerturik ere ez…", adierazi du Garazi Orobengoak, Ogasun zinegotziak.