Ezohiko eran izan arren, San Juan bezperako ohiturei eutsi gura izan diete gatzagarrek, eta urtero moduan, solstizioari ongietorria emateko su ederra prestatu zuten martitzenean. "Aurten berezia izan da San Juan bezpera eguneko ospakizuna. Hala ere, xarma berezia du egun honek, eta ekitaldi polita izan dugu, baita giro ederra ere", adierazi du Garazi Orobengoak, Ogasun zinegotziak.
Segurtasun tarteak errespetatuz
"Afaltzeko hamar mahai jarri genituen San Migel plazaren bueltan, eta mahai bakoitzean bost pertsona izan ziren eserita. Batetik bestera, gainera, segurtasun tarte ederra utzi genuen, eta oso ondo errespetatu zituzten egunerako jarritako neurriak herritarrek. Jatekoari dagokionez, berriz, guztira, bost kilo hirugihar eta hamar kilo txistorra prestatu genituen, eta afaltzeko, 60 edo 70 lagun inguru batuko ginen gutxi gora behera. Egunaren balorazio positiboa egiten dugu, eta herritarren jarrera nabarmendu gurako genuke", adierazi du Garazi Orobengoak, Ogasun zinegotziak.