Ekainaren 23an, 21:00etan, plazan afaldu ostean, 22:00etan piztuko dute San Juan sua Leintz Gatzagan. Sardinak eta sua izaten dira protagonista Leintz Gatzagako San Juan bezperan. Aurten, baina, zenbait neurri hartuta piztuko dute sua, eta, modu horretara, udako solstizioari ongietorria eman, San Migel plazan. Hala ere, sardinak beharrean, txistorra eta hirugiharra izango da aurtengo menua.
"Sardinak egiteko, parriletan ezin dugu brasarik egin, maskarek su hartzeko arriskua dago eta. Horrenbestez, menua aldatu eta zartaginean egindako txistorra eta hirugiharra izango da aurtengo menua. Normalean, sua egin aurretik zutik jaten dugu, mokadu eran. Aurten, berriz, mahaietan eserita eta gure arteko distantziak hartuz egin beharko dugu", adierazi du Garazi Orobengoak, Ogasun zinegotziak.
Suaren gainetik salto egin gabe
San Juan suaren gainetik ezingo dela saltorik egin azpimarratu gura izan du Orobengoak: "Erabiltzen ditugun gel hidroalkoholikoengatik… ezingo da aurten suaren gainetik salto egin".