Goizean ekin diote San Milixan eguna ospatzeari, eta egitarauari ekiteko Eskoriatzako Kuatruena auzotik irtenda Gatzagara oinez Gatzbidia egin dute zenbaitek. Eskoriatzatik ez ezik, Arrasatetik korrika egin dute Gatzbidea zenbait lagunek, eta giro polita sortu da elkarrekin ibilbidea egin dutenen artean.
Azoka eta pintxo dastaketa
Gatzbidea egin ostean Hustu Ganbara bigarren eskuko azokan produktuak erosteko aukera izan dute bertara hurbildu direnek. Herritarrek erabiltzen ez dituzten produktuak jarri dituzte salgai; hala nola, arropak, altzariak eta jostailuak. Ostean mokadutxo bat jateko aukera ere izan dute: beste batzuen artean, unean bertan egindako piper gorri pintxoak eta txistorra prestatu baitituzte. Hala, mokadutxoa jaten egin diete ongietorria Gatzbidea egitetik zetozenei.
San Milixan egunari amaiera emateko Larrain dantza egin dute herritarrek, musikaz lagunduta. Hain zuzen, Aretxabaletako gaiteroak izan dira dantzariei musika jartzeaz arduratu direnak.
