Egitarauari dagokionez, 10:00etan, Eskoriatzako Kuatruena auzotik irtenda, Gatzagara oinez Gatzbidia egiteko deia egin dute antolatzaileek. 10:30ean, berriz, Arrasateko kuadrilla batek deituta, arineketan irtengo dira zenbait lagun, Arrasateko Errementari plazatik, Gatz-bidia eginaz. Hauek, 14,5 kilometroko bidea izango dute aurretik, eta asmoa da talde osoa batera joatea, erritmo motelean, eta lagunartean ondo pasatzea.
Bigarren eskuko azoka eta jateko ugari
12:00etan, berriz, Hustu Ganbara bigarren eskuko azoka izango da Gatzagan aldiro egiten duten moduan. Herritarrek erabiltzen ez dituzten arren erabilgarri dauden arropak, altzariak, jostailuak… izango dituzte salgai. 12:30etan, mokadutxo bat hartu nahi duenak ere aukera izango du horretarako. Izan ere, zenbait produktu prestatuko dituzte herriko plazan, bertan. Gutiziak dastatzeaz batera, erosteko aukera ere izango dute bertaratzen direnek: gaztainak, piper erreak, buzkantzak, txistorra… izango dira. Honekin batera, 13:00etan, Gatz-bidetik oinez eta arineketan iristen diren guztiei ongi-etorria egingo diete herriko plazan.
Amaitzeko, dantzak
San Milixan egunari amaiera emateko, aldiz, 13:30ean, Larrain Dantza egingo dute animatzen diren herritarrek, eta musikaz laguntzen, Aretxabaletako gaiteroak izango dira.