Udalekuak hasteko, ezagutza jolasak izan zituzten, eta, behin haurrak eta begiraleak ezagutu ostean, sanferminak ospatzeko tartea hartu zuten. Horrekin batera, hainbat jolas egin dituzte egunotan, herrian zehar, eta auzolanerako tartea ere hartu dute. Izan ere, herritik Gatz Museora bidean dagoen banku baten bueltan, izpilikua eta erromeroa landatzen aritu dira. Eta, herriari kolorea emateko asmotan, eskailera batzuk margotzen ere aritu dira, besteak beste.
Hiruerreketan eta Landan
Herrian soilik ez dira egon, irteerak egiteko ere aprobetxatu dute-eta astea. Eguaztenean, esaterako, Hiruerreketara joan ziren, eta bertan, Kode jolasa egin zuten, bi taldetan banatuta. Eguenean, aldiz, Landako urtegian izan ziren egun-pasa. Gaur, berriz, Konkis jolasak izango dituzte, goizean.