Alde batetik, Rens Klaasse Ciclelive aldizkariko erredaktoreak bi ale eraman zizkien gatzagarrei. Ale horretan, Dorletako Ama birjinaren eta Santutegiaren bueltan iaz egindako erreportajea agertzen da. Bestetik, Mathieu Hermans eta Jan Jenssen txirrindulari ohien bina argazki eta maillot eraman zituzten, haien sinadurekin. Honekin batera, Hermansi buruz idatzi den liburua, Tegen de Stroom in, utzi zuten bertan, beste oroigarriekin batera.
Txirrindulari handiak
"Jenssen eta Hermans txirrindulari ohien maillot sinatuak hemen izatea ohore bat da guretzat. Herbeheretatik etorri dira, gainera, bisitan, eta ahal izan dugun harrera beroena egin diegu. Guk, trukean, ama birjinaren estatuatxoak eman genizkien guztientzat. Batetik, bisitarientzat, eta, bestetik, Hermansentzat eta Jenssenentzat. Oso gustura geratu gara bisita honekin", adierazi du Eugenio Otsoak. Jenssenek Frantziako Tourra irabazi zuen, 1968an, eta Espainiako Vuelta, 1967an, eta Hermansek, berriz, 1988an Frantziako Tourreko etapa bat irabazi zuen, beste lorpen batzuez gain.