Gatzagako plazan hasiko da martxa, 09:30ean, eta bi berritasun izango ditu: batetik, ibilbidean zehar egongo diren desbideraketak, eta, bestetik, Gatz Bidean egingo den zati bat. "Iazko ibilbidea asko gustatu zitzaien parte-hartzaileei, eta aurtengoa berdina izango da, aldaketa txiki batzuekin. Plazatik hasita, Gatz Bidera jaitsiko dira partehartzaileak, eta, berriro herrira bueltatuz, Isuskitza aldera joango dira; gero, Hiruerreketa ingurura, eta handik, Makatz-gain aldera joan ostean plazan amaituko da martxa. Guztira, 33 kilometro izango ditu ibilbide luzeak, baina desbideraketak hartuta motzagoa egiteko aukera ere izango da", adierazi du Beñat Agirreurreta antolatzaile taldeko kideak.
Eskerrak laguntzaileei
Boluntario ugari aritu da lanean pistak ondo jartzen. Orain, bidea markatzea soilik geratuko zaie, eta egunean bertan ere izango dute laguntza beharra. Batez ere, 20. kilometro aldera egongo dira edateko eta jatekoak –anoa postua–, eta bertan egongo direnei zein helmugan egongo direnei eskerrak eman nahi dizkiete aldez aurretik antolatzaileek.