Dorletako Ama txirrindulari taldeak jarritako erakusketaren bueltan eta beraien ibilbide profesionalaren gainean solasaldia eskainiko dute. "Gonbidatuak aurkeztuko ditugu, eta, ondoren, galderak egingo dizkiegu. Asmoa da beraien historia, izan duten egoera, irabazi dituzten lasterketak… ezagutzea. Ondoren, mahai-ingurura datozen entzuleei ere emango diegu galderak egiteko aukera…", adierazi du Alberto Altubek, antolakuntzako kideak.
Erakusketa arrakastatsua
Izan ere, Dorletako santutegiko erakusketak zeresana sortu du. Kas taldeko masajista izandako Karmelo Uriak batutako materiala ikustera hainbat bisitari joan dira, eta oraindik interesdun asko daudela adierazi du Altubek: "Leku askotariko txirrindulari gazte taldeen deiak jaso ditugu. Erakusketa ikustera bizikletan etorri nahi dutela talde handietan…".
Erakusketa bisitatzeko
Erakusketa ikusi nahi duenak zapatuan eta domekan izango du aukera, 11:00etatik 14:00etara. Astegunetan joan nahi duenak, berriz, deitu egin beharko du 647 15 48 45 telefonora.