09:00etan egin dute auzolanerako hitzordua Gatzagako plazan, eta 20 lagun inguru batu dira bertan. Autoetan beharrezko lan-tresnak sartu, eta jo eta su aritu dira hesolak eta metalezko hesia jartzen. Zelaia izoztuta zegoen, eta tenperaturak zero graduren bueltan, baina gatzagar bat baino gehiago manga motzean aritu da bero-bero lanean.
Ez dituzte edonolako hesolak jarri. Abenduaren 23an Arrasateko, Aretxabaletako, Eskoriatzako eta Gatzagako lagunak aritu ziren hauek margotzen, norberaren herria ordezkatzen duten koloreekin. Guztira laurogei izan dira, eta orain hauek babesteko eta pertsonalizatzeko aukera emango dute. Bost euroren truke, enpresek, kuadrillek edo norbanakoek hesola bat margotu ahalko dute, eta batutako dirua aurrerantzean egingo dituzten auzolanak finantzatzeko bideratuko dute. "Aurrerago emango ditugu argibideak, hesolak erosi nahi dutenek zer pauso eman behar duten jakiteko. Batzen dugun dirua primeran etorriko zaigu, oraindik auzolan asko geratzen zaizkigulako egiteko" azaldu du Garazi Orobengoa gatzagarrak.