Liburutegiak marrazki eta esaldi lehiaketa jarri du martxan

Imanol Beloki Unamuno 2018ko ira. 20a, 18:05
Iaz, Gatzagako liburutegian ateratako talde argazkia.

Aurtengo irakur puntuko irudia eta esaldia aukeratzeko lehiaketa jarri du abian Gatzagako liburutegiak. Baldintza bakarra jarri dute antolatzaileek: Gatzagako herritarra izatea. Horrez gain, ez dago adin mugarik, eta marrazkiak 20x7 zentimetroko formatua izan beharko du. Esaldiarekin, berriz, liburutegiari gatza eta piperra emango dion leloa aurkitu nahi dute.

Lanak aurkezteko azken eguna urriaren 11 da, eta egun hori baino lehen Labidean egongo den buzoian edota liburutegian bertan entregatu beharko da, eta modu anonimoan. Marrazkia eta esaldia gutun-azal handi baten sartu beharko ditu parte hartzen duenak, eta barruan, norberaren datuak dituen beste gutun-azal txiki bat –izen abizenak eta telefonoa– sartu beharko da.

Norbanako bakoitzak nahi beste marrazki edo lelo aurkeztu ahalko izango ditu, eta bi sari izango dira: bat, esaldi onenari; eta bestea, marrazki onenari. Irabazlea, berriz, Bibliotekaren Egunean, urriaren 24an, jakinaraziko da. Informazio gehiago, lanak egiteko ereduak eta gutunazalak liburutegian izango dituztela jakinarazi dute.

Berrikuntzekin datoz

Astelehenetan 17:30etik 19:00etara zabaltzeaz gain, eguen goizetan ere zabalduko dute, 10:30etik 12:00etara. Baita hileko zapatuetan ere, 11:00etatik 13:00etara. Liburutegi Arteko Mailegu Zerbitzua eskaintzen ere hasiko dira. Horrela, herritarrek behar dituzten dokumentuak Euskadiko Irakurketa Publikoko Sareko edozein liburutegitik bertaratuko dituzte, eta herrian jaso ahalko dituzte.

ALBISTEAK ESKUKO TELEFONOAN

Debagoieneko albiste nabarmenenak eta azken ordukoak Whatsapp edo Telegram bidez jaso gura dituzu? Harpidetu zaitez doan!

WHATSAPP: Bidali ALTA 688 69 00 07 telefono zenbakira –Whatsapp bidez–.

TELEGRAM: Batu zaitez @GoienaAlbisteak kanalera.

ASTEBURUETAKO BULETINA

Zure posta elektronikoan asteburuko albiste nabarmenekin osatutako mezua jasoko duzu. Harpidetu zaitez debalde hemen.


Harpidetza aukera guztiak