Arbasoek zabaldutako bidetik, iragana eta geroa lotuz

Imanol Beloki Unamuno 2018ko eka. 13a, 15:47

Puntaik Punta Debagoieneko bidezidorren jaialdiaren hirugarren edizioa izango da aurtengoa, eta Aretxabaletan eta Debagoienean gauzatuko da. Gatzagarrek ere ekimenean hartuko dute parte; horretarako, Gatzagatik Eskoriatzaraino dagoen PR-100 bidearen konponketa aldarrikatzeko, Gatzagatik Aretxabaletarainoko ibilbidea oinez egingo dute Puntaik Punta jaialdirako.

Zapatuan 16:30ean aterako da martxa Gatzagatik, Aretxabaletaraino. Gatz bidie izenaz bataiatu duten ibilbidea egingo dute Eskoriatzaraino, bertan trenbidearekin bat eginda, Aretxabaletarako bidea hartzeko.

Bailara lotzeko aldarrikapena

Debagoieneko bidezidorren jaialdian ezin du hutsik egin bailara lotzea lortuko duen bideak. "Betidanik egon da bide hau gatzagarren eta inguruko auzotarren bizimoduari lotuta, eta, azken urteotan, lurzoruen erabilpena alde batera uztearekin batera, egunerokotasunean presentzia galduaz joan da, lokaztu egin da… baina horrelako altxor bat ezin genezake ahaztu, ezinbesteko da gatzagarren mugikortasun iraunkorrerako eta bailara lotzeko". Horrela adierazten digute ekimeneko kideek..

Ekimenaren leloa den 'Leintz lotzen'-en garrantzia

"Zalantzarik gabe, bailarako muturrean dagoen Gatzaga herriarentzat ezinbesteko da mugikortasun praktiko bat izateko, herri txikien etorkizunerako beharrezko den mugikortasuna, baina Gatz Bidie askoz gehiago da,  bailara osorako onura da: Bailara lotuko du, bailararen bizkarrezurra izango da, naturara hurbilduz, txikiak zein handiagoak bat eginez, herriak batuz eta bailararen nortasuna finkatuz. Nola litzake posible, Leintz Bailara izena eukita, mugikortasun eta lotura plangintza batean, Leintz Gatzaga bailaratik at uztea?", adierazi dute ekimeneko antolatzaileek.

Aurrekariak dituen egitasmoa

Lau kilometro eta 300 metroko tartea konpondu eta txukuntzea eskatuko dute. Gatzaga Kuatruenarekin eta, modu horretan, bailararekin lotzeko. Bidea ezagutzeko, zapatuko ibilaldian parte hartzeko gonbidapena egiten diete antolatzaileek bailarako herritarrei. Lineako autobusa 15:50ean irteten da Eskoriatzatik Gatzagarantz.

ALBISTEAK ESKUKO TELEFONOAN

Debagoieneko albiste nabarmenenak eta azken ordukoak Whatsapp edo Telegram bidez jaso gura dituzu? Harpidetu zaitez doan!

WHATSAPP: Bidali ALTA 688 69 00 07 telefono zenbakira –Whatsapp bidez–.

TELEGRAM: Batu zaitez @GoienaAlbisteak kanalera.

ASTEBURUETAKO BULETINA

Zure posta elektronikoan asteburuko albiste nabarmenekin osatutako mezua jasoko duzu. Harpidetu zaitez debalde hemen.


Harpidetza aukera guztiak