Joan den egubakoitzean, sansebastianak ospatzeko danborrada egin zuten Leintz Gatzagako eskolako haurrek. 12:45ean batu ziren eskolako haurrak Leintz Gatzagako pilotalekuan, makilak eskuan, danborrei gogor emateko asmoz. Guztira, hiru pieza jo zituzten, San Sebastian martxa, Tatiago eta Iriyarena, eta ederto pasa zutela adierazi du Eider Encina irakasleak.
Urduri, baina pozik
"Goizean danborrada egiteko elkartu ginen pilotalekuan, eta urduri samar agertu ziren haurrak. Izan ere, hainbat guraso eta herritar eurak ikustera gerturatu ziren, eta, horren ondorioz, bi haurrek ez zuten danborra jo nahi izan. Hala ere, behin hasi ostean, pila bat disfrutatu zuten danborra jotzen, eta bikain astindu zituzten danborrak".
Arratsaldean, elkartera joan ziren, eskolako haurren bi gurasok deituta. Bertan, txokolatejana izan zuten, bizkotxoekin lagunduta, eta, tripa ondo bete ostean, berriketan egiteko tartea hartu zuten; horrela bukatu zuten eguna.
