Leintz Gatzagako jaiak 2016

Musika eskaintza zabala izango da aurten Leintz Gatzagako Andramari jaietan

Imanol Beloki Unamuno 2016ko ira. 2a, 11:22
Arkada Social taldeak Arrasateko San Juan jaietan emandako kontzertuan.

Gatzagako Andramari jaiak irailaren 7tik 11ra bitartean ospatuko dira, eta egitarau zabala prestatu dute gatzagarrek. Musikak garrantzi handia izan du beti Gatzagako jaietan eta aurten ere ez dira atzean geratuko; izan ere, talde handiak eta estilo ezberdinetakoak izango dira bertan.

Gorputza mugituz hasiko dituzte Andramari jaiak gatzagarrek; izan ere, swing ikastaro herrikoia izango dute eguenean, Paula de la Fuenteren eskutik. 17:30ean izango da ikastaroa, herriko plazan, eta pauso batzuk ikasi ondoren, dantza egingo dute animatzen diren herritarrek.

Talde handiak, herri txikian

Egubakoitzean, kontzertuen gaua izango da. 22:30ean hasita; D-Skarga, Criminal Remains eta Arkada Social taldeak izango dira oholtza gainean. Aretxabaletako D-Skarga talde gazteak ska doinuak eramango ditu. Criminal Remains taldeak, berriz, grabatu berri dituen kantak eskainiko ditu lehen aldiz. Talde honetako partaideak ere aretxabaletarrak dira, baina bi gatzagar ere badaude taldean, biak gitarra-joleak. Jose Ayudarte eta Beñat Agirreaurreta, hain zuzen ere. Amaitzeko, Arkada Social punk-rock taldea izango da gaueko talde izarra. Bailaran ezaguna den talde arrasatearrak Sin mirar atras tourreko azken kontzertuetako bat eskainiko du Gatzagan.

Zapatuan, berriz, Aldo Mila & Bandaren musika afrikar tradizionala entzuteko aukera izango da 23:00etan. Aldo Mila Angolako musikaria da, eta Gasteizko hainbat musikarirekin izango da herrian (Ricardo Urrutia gitarra-jolea, Nando de la Casa perkusioa, Txefe Ferroni Saxoa eta Alberto de la Casa Baxu-jolea). Gauari amaiera emateko, berriz, Fan&Go Zarauzko erromeria taldea igoko da oholtzara.

Azken egunean, berriz, Adarhots taldea egongo da 13:30ean. Gasteizko taldea hamabi lagunek osatzen dute, eta taldekide guztiek tronpak jotzen dituzte. Errepertorio osatua eramango dute Gatzagara: pelikuletako soinu bandak, euskal kanta tradizionalak eta musika klasikozko piezak joko dituzte besteak beste. Saioa herriko plazan hasiko dute, baina ondoren, Soran Etxea hotel aurrera joango dira kontzertuari amaiera ematera.

Hainbat berrikuntza egitarauan

Swin ikastaroaz gain, egubakoitzean, Jin&Jan kantu bazkari herrikoia egingo da frontoian, 14:30ean. "Bakoitzak bere bazkaria prestatuko du, baina arroza oinarri hartuta egiteko eskatu diegu herritarrei. Izan ere, arrozarekin errezeta ezberdinak prestatzen dakitenak daude herrian, eta, hala, menu ezberdinak ikusteko eta egiten ikasteko erabaki dugu hala egitea" adierazi du Joanes Mendizabal kultura zinegotziak. Bazkaria alaitzeko, berriz, Sei Pistols eta Trabuko Bat taldea izango da oholtza gainean.

Zapatuan, aldiz, kintoen arteko jolasak egingo dira elektrotxarangarekin animatuta. Hala ere, urte berekoekin edo kuadrillaka egin beharrean, hamarkadaka banatuko dituzte partaideak.

ALBISTEAK ESKUKO TELEFONOAN

Debagoieneko albiste nabarmenenak eta azken ordukoak Whatsapp edo Telegram bidez jaso gura dituzu? Harpidetu zaitez doan!

WHATSAPP: Bidali ALTA 688 69 00 07 telefono zenbakira –Whatsapp bidez–.

TELEGRAM: Batu zaitez @GoienaAlbisteak kanalera.

ASTEBURUETAKO BULETINA

Zure posta elektronikoan asteburuko albiste nabarmenekin osatutako mezua jasoko duzu. Harpidetu zaitez debalde hemen.


Harpidetza aukera guztiak