"Leintz Gatzagan auzolanak tradizio handia duenez, proposatu da kargu-hartze/lagatzea bera udal ordezkarien artean bakarrik egin beharrean, bi kontuak batu eta Auzolan Eguna egitea. Goizean (09:00etan) elkartuko gara, eta Udaletik zehaztuko dituzte eginbeharreko auzolanak, eta beharren arabera antolatuko ditugu taldeak ( (Bengoerreka, bideen garbiketa…)", kontatu dute. Umeek ere izango dute euren auzolantxoa; haiek herriko plazan dute hitzordua, 10:00etan.
Bazkari herrikoia
Auzolanaren ondoren, 13:30ean udaletxean egingo den kargu-hartze ekitaldira joatea litzateke asmoa. Eta eguna borobiltzeko, 14:30ean herri bazkaria antolatu dute.
"Komeni da jendea lehenbailehen animatzea; ze nahiko genuke 60-70 bat laguneko bazkaria egitea eta horiendako guztiendako janaria catering bitartez ekarri behar dugunez (Trikikupela), jakin beharra dugu zenbat lagun etorriko diren bazkarira. Beraz, jarri dugu martitzena (ekainaren 9a, bihar) bazkarirako izena emateko azkeneko eguna", azaldu dute. Labidean eman behar da izena; eta prezioa izango da 20 euro (10 euro umeendako). Gainera, bazkalosterako musika iragarri dute, eta egunean sorpresa politen bat egongo dela ere bai.