Inaugurazio ekitaldiko parte-hartzaileen artean izango dira Ainhoa Iraola, Gipuzkoako Foru Aldundiko Ingurumen eta Obra Hidraulikoen Saileko Zuzendaria; Eneko Etxeberria, Ur Kontsorzioko presidentea, eta Eugenio Otsoa Gatzagako alkatea.
Hiru ordezkariek azpiegitura berriaren gainean jardungo dute, eta teknikari batek araztegiaren funtzionamenduaren gaineko xehetasunak emango ditu.
Milioi erdi euro inguru
Bi ekipamendu eraiki dituzte saneamendu sare berrian: 300 metroko kolektorea (ur-zikinak batu eta araztegira eramateko) eta hondakin uren araztegia bera. Iazko abenduan hasi zituzten obrak eta joan den ekainean bukatu. 500.000 euro inguru inbertitu dituzte lan horretan erdibana Gipuzkoako Diputazioak eta Ur Kontsorzioak.
Behin araztegia eraikita, herriguneko ur-zikinak garbituko ditu Deba ibaira bota aurretik. Dagoeneko arazketa prozesua abian dago. Aurrerantzean, Gipuzkoako Ur Kontsorzioaren esku geratuko da araztegiaren ustiapena eta mantenua.
