Euskal Herriko bertsolari txapelduna Gatzagan izango da, otsailaren 15ean

Amets Arzallus txapeldun izendatu berritan
Amets Arzallus, Andoni Egaña… eta Gatzagako "urretxindor eta kurriloiak" daude gonbidatuta datorren otsailaren 15ean Soran etxean egingo duten bertso bazkarira. "Egia esan, Amets Arzallus hona etortzea hitzartu genuen Euskal Herriko bertsolari txapelketa bukatu aurretik. Gero jakin izan genuenean bera izan zela txapelduna…fenomeno!", aitortu du Rosa Urretak, bertso bazkaria antolatu duen Sorginak elkarteko ordezkariak".

Hark jakinarazi du bertso bazkariak arrakasta izatea espero dutela: "Jende asko etorriko dela uste dugu: 70-80 bat lagun-edo, eta etorriko diren umeendako mahai berezia prestatuko dugu, nagusiengandik aparte eta eurendako propio pentsatutako menu eta guzti".

Sarrerak gaur, barikua, salgai

20 eurotan jarriko dituzte bazkarirako txartelak salgai, gaur (egubakoitza) bertan, Soran etxean, "sarrerak bukatu arte", Urretak esandakoaren arabera; beraz, interesa izanez gero, kontuz ibiltzea komeni.  
Bestalde, bazkariaren aurretik trikitilariak izango direla ere jakinarazi du hark, eta bazkal osterako, ipuin kontalaria gonbidatu dutela: "Vanesa Gonzalez arrasatearrak jardungo du. 16:30ean hasiko da, eta ordubete-edo iraungo du. Modu horretan nagusiek lasaiago gozatu ahal izango dute bertsoez" (barre).

Ordutegia eta prezioa

Bazkariko menua ere dagoeneko erabakita dute: sarrerakoak (entsaladak, frijituak…), txipiroiak plantxan edo entrekota aukeran, postrea, ardoa (edo bestelako edatekoren bat) eta kafea. "Hortik aurrerakoa norbere kontura izango da", zehaztu du Rosa Urretak. Orduari dagokionez, berriz, 14:00etan egin dute bazkarirako hitzordua, baina halakoetan gertatzen den moduan, aurretik ere izango da gustura ibiltzeko aukera Soran etxe ingurura gerturatuz gero.

Korrikarekin bat egiteko

Otsailaren 15ean egingo duten bertso bazkaria tradiziozkoa bilakatu da azken urteotan Leintz Gatzagan. "Korrika tokatzen denean, harekin bat egiteko hasi ginen bertso bazkaria antolatzen, baina azken urtetan, nahiz eta Korrika ez izan, berdin-berdin egin izan dugu bazkari hori", esan du Sorginak Elkarteko ordezkariak.

ALBISTEAK MUGIKORREAN

Debagoieneko albiste nabarmenenak eta azken ordukoak Whatsapp edo Telegram bidez jaso gura dituzu? Harpidetu zaitez doan!

WHATSAPP: Bidali ALTA 688 69 00 07 telefono zenbakira –Whatsapp bidez–.

TELEGRAM: Batu zaitez @GoienaAlbisteak kanalera.