Izan ere, besteak beste, edateko ura zein saneamendu urak banandu, eta horiek araztegi berrira bideratzeko, beharrezkoa zen hodia errepide azpitik pasaraztea, Dorletara doan errepidearen azpitik, hain zuzen. Eta jakinda horrek errepidearen etetea, eta ondorioz, herritarrendako eragozpenak ekar zitzakeela, bada, Gabonak aprobetxatu dituzte zeregin horietarako.
Euri urei dagokienez, berriz, horiek errekara joaten segituko dute, orain arte moduan.
Errepide azpiko obrez gainera, besteak beste, errepide inguruko pinu batzuk botatzeko ere aprobetxatu dute.
Edozelan ere, horiek "hasierako lanak" besterik ez dira izan. Marian Aristik, Leintz Gatzagako aparejadoreak esandako moduan, orain hasiko dira "obra potoloa" egiten.
Azaro amaieran hasi zituzten araztegia eraikitzeko obrak, Gipuzkoako Foru Aldundiaren eskutik. 629.357,43 euro da aurrekontua (BEZa barne). Eta bukatzeko epea, berriz, bost hilabetekoa. Azpiegitura horren helburua da herriko ur zikinak garbi botatzea Deba ibaira.
