Frontoia euritik babesteko toki bikaina bilakatu da Leintz Gatzagan eta berogailuei esker jendeak gustura ikusi ditu San Milixan feriara bertaratutako artisauen lanak.
Lehen begiratuan, behintzat, batez ere jatekoak eduki du gaur arrakasta: Sorginek prestatutako talo eta salda jan-edan dute askok. Kanpoaldean Alberto Altubek bitxikeriak kontatzen zizkien gaztaina protagonista zen postura bertaratzen zirenei: "Garai batetan biztanleen dietaren parte zen gaztaina, eta ogia egiteko gaztain-irina erabiltzen zen, baita galletak, pastak, bizkotxoa...".
Baina entzuteaz gainera, jendeak produktu horiek dastatzeko aukera ere izan dute: "Den-dena dago ederra".
Txirrindularitzako bitxikeriak
Dorletako Ama txirrindulari taldeak, ostera, postua ipini du. Eta bertan urteetan zehar txirrindulariek Dorletako amari opari moduan utzitakoak erakutsi dituzte. Eta ez da bitxikeriarik falta izan, Joserra Agirreurretak azaldu duenez: "Italiako Giroa 1975ean irabazi zuen Francisco Galdosen mailota, Ramon Mendiburu Fagorreko txirrindulariarena zein Olano eta Lejarretarenak...".
Eta gainera, Eibarko pertsona batek eskuz egindako bizikleta txiki bat ere ikusgai egon da.