Herriko plazan hasi eta bukatu da itzulia eta bi zati izan ditu; 32,6 kilometro, orotara. Aurten, nobedade eta guzti, gainera: Dorletatik Hiruerreketara eta handik antenetara egin dute lehen zatian; eta Goierri eta Jarindo aldera, bigarrenean. Frontoian egokitutako anoa postuan izan dute mokadutxoa egiteko aukera, eta hainbatek oparia ere eraman dute etxera, gazta, urdaiazpiko edota pateak zozketatu baitituzte amaieran.
Erritmo ezberdinak
Askotariko jendeak parte hartu du proban eta guztiak izan dituzte aintzat antolatzaileek. "Asko ibiltzen direnek kilometro eta zailtasun gehiago eskatzen dizkigute, baina gu partaide guztietara moldatu behar gara", azaldu digu antolakuntzako Alberto Altubek.
Lokaztuta eta hoztuta
Eguraldiak lagunduz gero, parte-hartzaileak lasai egoten dira itzulia egin ostean, baina gaurko giroarekin apur bat hoztuta heldu dira eta presaka samar ziren, etxera joateko ez bazen ere ahalik eta bizkorren dutxa bero bat hartzeko gutxienez.
Gurutze Gorrikoak bertan izan dira, baina apenas izan duten lanik, ez baita aipatzeko moduko eroriko edo zauririk izan, zorionez.
Datozen bi hilabeteotan hainbat bizikleta martxa izango dira gure ibarrean; gaurkoa izan da lehena.