Baso publikoetako egurra herritarren artean banatzeko ohitura du Udalak, nahiz eta azken urteotan nabarmen egin behera eskaerak. Egur hori eskatzeko gutxienez urtebetez herrian erroldatuta egon behar dute interesatuek, eta derrigorrez herrian bertan erabiltzeko izan beharko da jasotakoa.
Aldundiko basozainek erabakitzen dute urtero basoko zein gunetako egurra har dezaketen eskatzaileek; loteak esaten diete horiei. Izena emandako eskatzaile kopuruaren arabera egiten dituzte lote horiek, eta zozketa bidez izendatu gero. Behin lotea emandakoan eskatzaile bakoitza arduratuko da egurra txikitu, jaso eta basotik ekartzeaz.
Loteen zozketa egiteko eguna oraindik ez dute izendatu; zehaztutakoan interesatu guztiei jakinaraziko diete.
Jarduera ekonomikoen zerga
Bestalde, azaroaren 10a bitartean izango da zabalik jarduera ekonomikoen gaineko zerga borondatez ordaintzeko epea. Helbideratu gabeko ordainagiriak zergadunak adierazitako helbidera bidaliko dituzte urrian zehar, eta ordainketa gero banku edo aurrezki kutxa bidez egin beharko dute.