Eguerdi partean elkartu eta herrian ibilalditxo bat egin ondoren, bazkaltzera joango dira guztiak Garro jauregiko lehen solairura. Urtero legez bazkari bikaina eskainiko diete bertan. Bazkalostea, ostera, trikitilariek girotuko diete, eta kantuan egin, kontu-kontari jardun edo karta jokoan egingo dute elkartutakoek, arratsaldea bukatu artean.
Biharko Erretiratuen Egunean bazkaltzen elkartutakoen artean nagusienak direnei aipamen berezia egingo diete, eta oparitxoa jasoko dute Udalaren partetik.
Urrian erretiratuen irteera
Bestalde, Toki Eder erretiratuen elkarteak irteera egingo du urrian, ohi duen legez. Udazkeneko irteera Nafarroa aldera egin izan dute eta aurten ere harantz joko dutelakoan daude zuzendaritzako kideak. Dena den, biharko bazkarian bazkideen artean eztabaidatuko dute kontua, eta iritziak jaso. Gero erabakiko dute nora jo, zer egin bertan, eta zein egunetan. Seguru asko urriko lehenengo astean egingo dute irteera hori.