Landagipuzkoa 32 Gipuzkoako Foru Aldundiak 1000 biztanletik beherako herriak indarberritzeko helburuaz sortutako egitasmoa da. Proiektu horren baitan, Gipuzkoako 1000 biztanletik beherako 32 herritan, 39 proiektu gauzatzen dihardu Foru Aldundia; hain justu, horietako bi dira Gatzagan zapatuan aurkeztu zituztenak.
Batetik inauguratu zuten Gatzagako pilotaleku zaharberritua. Hain justu, lehendik zegoen markesinaren estalkia egokitu, birgaitu eta hobetu dute, lehengo kobrezko estalkiaren ordez zeramikazko teila gorria ipiniz; markesina bera lurreraino ere jaitsi dute pilotalekuaren aurrealdean eta azkenik, pilotalekua guztiz itxi dute. "Gatzaga herri hotza da eta pilotalekuari egin diogun itxiturarekin, frontoiaren erabilera hirukoiztu egingo da" esan zuen inaugurazio ekitaldian Eusebio Villar alkateak. Hain zuzen ere, dagoeneko igarri dute frontoi berrian erabilera asko igo dela: "Agian orain eskaera handiegia izango da. Hori horrela bada, udaletxeak erabaki du, ordu beteko txandak egitea, herritar guztiek izan dezaten pilotalekua erabiltzeko aukera".
Ur deposituaren lehen harria
Frontoi berriaren inaugurazio ekitaldia aprobetxatu zuten Arlaban gaineko ur hornikuntza eta saneamenduaren lanei hasiera emateko; izan ere, proiektu hau ere, Landagipuzkoa 32 egitasmoaren baitakoa da. Hain justu, eta lehorte garaian herria ur gabe gelditzeko arriskua zegoela ikusirik erabaki dute lan hauek egitea. Hala, eta Gatzagainen ura badagoela ikusirik, bertan ur depositu bat egingo dute. Hura herrian dagoenarekin lotu eta goitik behera, hodi sistema baten bitartez, herrira ura ekarriko dute. Lan horiek aprobetxatuko dira, gainera, ur zikinak batuko dituen beste sare bat egiteko. "Sistema honekin, gainera, orain herrira ura ekartzeko dugun sistema merkatuko dugu" adierazi zuen alkate Eusebio Villarrek.
Instituzioen ordezkaritza
Zapatuko ekitaldi bikoitzean izan ziren,Landa Ingurunearen Garapeneko Diputatu Rafael Uribarren, Florentino Ugalde, frontoiaren eraberritze lanak egin dituen eta ur hornikuntzaren lanak egingo dituen Etorlur enpresako gerentea, Eusebio Villar Leintz Gatzagako alkatea, zinegotziak eta hainbat herritar. Rafael Uribarren diputatuak azpimarratu zuen, egun pozgarria zela gatzagarrendako eta baita Foru Aldundiarendako ere, herri txikien eta handien arteko zerbitzu oreka bermatzea, diputazioaren ardura ere badelako.