Zundaketa horien helburua da herria mugitu egiten den edo ez jakitea. Udal ordezkariek susmo hori daukate, eta Aldundiari jakinarazi ostean aztertzea erabaki zuen horrek. Azterketa horren emaitzak datorren urtean jakingo dituzte, eta horiek diotenaren arabera jokatu beharko dute gero: "Ikusi egin behar zer dioten, eta azterketa hori nahikoa izango den edo ez", dio Eusebio Villar alkateak.
Arau subsidiarioen berrikusketa
Azterketa horrek arau subsidiarioekin du zerikusia. Izan ere, arauen berrikusketa egin beharrean daude Gatzagan, 1986tik begiratu barik daudelako, baina herriaren mugimendu horrek dena baldintzatzen duela dio alkateak, "etxeak egitea esaterako". Arauen berrikusketari heltzeko, gainera, aurre-ikerketa geologikoa egin beharko litzatekeela uste du: "Urak nondik pasatzen diren ikertu, lurrak aztertu… Baina horrek gastu handia dauka, 50 mila euro ingurukoa, eta Udalak ez dauka dirurik".
Hortaz, Gatzagak daukan erronken artean egon arren arau subsidiarioen berrikusketa, urte batzuetan ezingo diotela heldu iragarri du Villarrek "diru kontua delako".