Aldundiak azken agintaldian landutako Kudeaketa Planaren berri emango du lehenengo Uribarrenek eta herritarrek euren iritzi, ekarpen eta galderak aurkezteko tartea izango dute gero. Bilera herritar guztiendako dago zabalik eta interesa dutenek aurrez jakinarazi behar dute: 943 11 22 90 zenbakira deitu edo gipuzkoaeraikitzen@gipuzkoaeraikitzen.net helbidera mezua bidali.
Gipuzkoa Eraikitzen izeneko ekimen barruan antolatutako bisita da biharkoa eta Aldundiaren kudeaketa herritarrekin partekatzeko eta aztertzeko helburuarekin sortu dute. Aurkeztuko duen Kudeaketa Planean zazpi helburu dituzte zehaztuta, tartean mugikortasun aurreratua eta komunikazio azpiegiturak indartzea. Eta jakinaraziko du plan horretan finkatutako helburuetatik %87,6 beteta zeudela 2010eko ekainean.
Alkateak urteari errepasoa
Eusebio Villar alkatea, ostera, Goiena telebistako Magazinea saioan izango da bihar (19:45). Eneko Azkarate eta Arritxu Barruso kazetarien galderak erantzungo ditu, eta azken urteari errepasoa egin. Herritarrek ere egin ahal izango dizkiote galderak, aurretik helbide honetara idatzita: magazinea@goiena.com.