Abenduaren 11rako ekitaldiren bat antolatu gura dute. Eta 12an, domeka, herria apainduko dute. Euskal giroko Gabonak izango dira protagonista aurten eta euskal sukaldea, Olentzeroren baserriko sukaldea hain zuzen, prestatuko dute herriko txoko batean. Hori bai, Gabon eguna arte ez dela inor egongo sukalde horretan iragarri dute eta Gabon egunean, kalejira eginaz abestu ondoren, Olentzero bera etorriko da sukaldera umeen gutunak jasotzera.
Gainera, herri guztia euskal mitologiako pertsonaiekin apaindu gura dute: Anbotoko Mari; Maritxu teilatuko; euskal sorgina; Tartalo; Basajaun… Pertsonaia bakoitzaren aldamenean azalpen txiki bat jarriko dute eta lehiaketa egin gero: "Egindako galderen erantzunak Labidea dendara eroan beharko dituzte umeek eta zuzen erantzundakoen artean zozketa egingo dugu Gabon egunean", argitu dute antolatzaileek.