Ainara Zubillaga Kultura zinegotziak azaldu digu horren zergatia: "Jakin dugu ohitura zela zuriz jantzita joatea egun horretan eta, gainera, lau orriko hirustaren bila ibiltzea. Hirusta hori urte guztian gorde eta hurrengo urteko San Juan sutara bota behar da norberaren desio edo nahiekin batera".
San Juan bezperako ekitaldiak Gurel elkarteak hasiko ditu eta ilunkara girotzeko eskulanen bat –iaz erratzak egin zituzten– eta jolasak egingo dituzte. Urtero legez, sardinak eta saihetsak erreko dituzte gero, herritar guztiendako (21:00) plaza inguruan eta bukatutakoan San Juan sua piztuko dute (22:30). Ez da izango Gatzagako su bakarra, baserri inguruetan ere egingo dutelako bakarren batzuek.