Horretarako baina hainbat lan egin behar dituzte Iberdrolako langileek, tartean transformadore zaharrera beharrean berrira lotu argindarraren dorretik datozen kableak. Eta lan horiek egiteko argindarra moztu beharko dute astelehenean, hilak 23, 08:30etik 13:30era bitartean. Udalak jakinaren gainean jarri ditu herritarrak ahal den eragozpen gutxien sortzeko.
Banatzailea bai, sortzailea ez
Transformadore zaharretik ere ondo jasotzen dute argindarra herritarrek etxean, baina berritze lanak egitera derrigortuta zegoen Udala. Industria Sailak exijitu zion argindar banatzailea delako, hau da, Iberdrolari erosi eta herritarrei banatzen dielako Leintzargi SL enpresaren bitartez. Horiei zorrotz egiten die jarraipena Industria Sailak. Lanok egiteko 122.000 euro gorde zituen iazko aurrekontuan Udalak.
Gatzagako Udala argindar banatzailea izan arren ez da sortzailea –ez du argindarrik sortzen beste herri batzuek egiten duten moduan–. Hala ere, banatzen jarraitzeko erabakia hartu du, nahiz eta jakin gero eta zorrotzagoak izango direla arauak eta trabak ere etor daitezkeela. Herritarrak pozik daude zerbitzuarekin eta Udalak hori hartu du kontuan aurrera egiteko.