Sorginak Emakume Elkarteak 22. urteurrena ospatuko du Emakumeen Nazioarteko Egunean. 1987an hasi zuen ibilbidea hain urruti ailegatuko zenik askok ez zuten pentsatuko –halako herri txikian gainera– baina oraindik bizirik eta indartsu diraute. Horregatik hain zuzen, emakumeen artean sortutako giroari eta harremanei eusteko, herriko emakume gehienak elkartzea dute helburu aurten. Jateko ederra bermatuta dagoela diote antolatzaileek eta bazkalostean giro bikaina ere bai: trikitilariak dantzan egiteko eta isuskien zozketa, sorginetan sorginenei emateko. Izenak Labidea dendan jasoko dituzte aste guztian, hilaren 28a da azken eguna.
Argazki erakusketa
Gizarte Zerbitzuak, bestalde, emakumeen gaineko argazki erakusketa antolatu guran dabil. Herritarren laguntza behar du horretarako etxean gordetako argazkiak jaso gura dituztelako, beti ere emakumea protagonista dela. Argazkiok udaletxera eroan behar dira –eskaneatu eta jabeari itzuliko dizkiote–, eta azken eguna astelehena da, hilak 23.
Erakusketa txukuna egiteko behar beste argazki elkartuz gero, martxoren 8aren bueltan jarriko dute ikusgai –data zehatza erabaki barik daukate–, eta hainbat astetan egongo da zabalik.