Elizak emandako ermitari Estatu Fondoko dirulaguntzari esker berritu zioten teilatua. Orduan, baina, 44.000 euro bakarrik iritsi ziren Gatzagara Espainiako gobernutik, eta lehen faseko lan guztiak ezin izan zituzten bukatu; beste 30.000 euro inguru behar ziren horretarako.
Lanok bukatzeko Udalak berak jarriko du diru horren zati bat eta Landa Garapena sustatzeko Erein egitasmoaren bitartez jasoko du bestea. Teilatua berritu zion Eskoriatzako Razkin enpresak ura jasotzeko hodiak jarriko dizkio orain, ermitari, eskumako aldean.
Bigarren laguntza erabakitzeko
Estatu Fondotik bigarren dirulaguntza etorriko dela iragarri dute oraintsu; 28.432 euro Gatzagara. Udalak oraindik ez du erabaki zertarako erabiliko duen, batez ere oso kopuru txikia delako: "Ermitako bigarren fasea hasi gurako genuke, baina oso diru gutxi da eta lanok erdi eginda ez ditugu utzi gura", azaldu du Eusebio Villar alkateak.