Domekako meza Dorletako Santutegian esan beharrean San Martinen ermitan esango dute, 12:30ean. Eta ondoren, mokadutxoa eskainiko die Udalak elkartutakoei musika lagun dutela: patata tortilla eta frijituak. San Martin eguneko ohitura da mokadutxoa egin bitartean dokean jokatzea gizonezkoek, baina azken bi urteotan ez dute halakorik egin herriko nagusienek. Izan ere, txirrindulari lasterketa antolatzen dute egun horretan, eta ordu berean izaten denez helmugara helduera gizon askok nahiago izaten dute herrian geratu.
Antzinako parrokia
Herria pasatu –Gasteizera bidean– eta errepidetik eskuma aldera geratzen diren baserriek osatzen dute Goierri auzoa. Bertako ermita parrokia izan zen antzina, baina 1331n, herria sortu zenean hain zuzen, San Millango eliza nagusiaren menpe geratu zen, gainontzeko auzoetako parrokiak legez. Aspaldiko ponte edo bataiarria oraindik ermitan daukate.