Andramari jaiak bukatu ostean herriko erretiratuak omentzen ditu Udalak urtero, eta bihar, zapatua, bazkaltzera gonbidatuko ditu. Garro jauregian dute Gatzagako erretiratuek egoitza eta bertan bazkalduko dute 35en bat kidek. Herrian bertan zein baserrietan bizi diren erretiratuak elkartuko dira, eta bazkalostea trikitilariek girotuko diete karta-jokoan egiten duten bitartean.
Bukatzeko oparitxoa banatuko die Udalak, eta herriko nagusienek opari berezia jasoko dute. Nagusiena, Asteisolo baserriko Narciso Beitia da. Udaletxean dituzten datuen arabera 95 urte ditu. Emakumeen artean, ostera, Matilde Arrese da, 90 urterekin.