Horretarako, baina, txanda aurrez hartu beharko dute herritarrek Eskoriatzako osasun etxera deituta (943 71 44 52). Lehen legez, udaletxeko beheko solairuan dagoen bulegoan pasatuko du kontsulta.
Orain arte astean bi kontsulta pasatzen zituzten: martitzenetan eta egubakoitzetan. Martitzenetan mediku bat etortzen zen eta egubakoitzean beste bat, eta herritarrek zein medikurengana joan aurrez izendatuta zeukaten. Hemendik aurrera eguaztenean datorren medikuak herritar guztiak hartuko ditu. Bi medikuak txandaka etorriko dira, aste baten bata eta hurrengoan bestea.
Zerbitzua hobetzeko
Udaleko eta Eskoriatzako osasun etxeko arduradunek elkarrekin hartutako erabakia da. Itxura baten zerbitzu murrizketa iruditu arren baten bati, zerbitzua hobetzeko erabakia izan gura du. Izan ere, astean behin bakarrik etor zitezkeen gatzagarrak dagokion medikuarengana –aurrez izendatutakoa– orain arte ere, eta medikua agertu ezean –Eskoriatzan lan asko zutelako gertatu izaten zen– hurrengo astera arte itxaron behar zuten. Hartutako erabakiarekin, astean behin mediku bat izango dela Gatzagan, herritar guztien zerbitzura, ziurtatu dute.