Hala, datorren astean ludotekako begiralearekin batzartzekoak dira, egon daitezkeen aukeretaz berba egiteko. Dagoeneko badituzte ideia batzuk, Gurel elkarteko kide Eguzkiñe Alberdi dioskun moduan: "Umeek ludoteka modu jarraian erabiltzeko moduko aukerak landu gura ditugu. Hala, adibidez, koadro bat zelan margotzen den ikusiko dute, pausoz pauso. Oraingoz, zenbat ume dabiltzan, zein talde egin daitezkeen… begiratzen gabiltza".
Alberdik dioenez, ume askok eskolatik kanpoko ekintzak egiten dituzte, baina horrek ez du esan gura ludoteka gutxiago erabiliko denik: "Negurako irtenbide bikaina da, eta Gatzagan badaude ume dezente, gainera".
Herriko ume gehienak
Ikasturtea astelehenean hasi zuten. 16:30etik 18:30era, ludotekan batzen dira umeak begiralearekin, eta gero, beste ordu bete, liburutegian. Gatzagako ume gehienek ematen dute izena. Gainera, adin tarte zabala hartzen du ludotekak: 2. mailatik hasi eta Derrigorrezko Bigarren Hezkuntzako 3. mailara bitartekoak joaten dira hara.