Asier Elkorobarrutia mendien ardura duen zinegotziak badaki basoa garbi izateak duen garrantzia. Hala, garbiketa lan horiek egiteko makina erostea zuen helburu iaz abeltzainen elkarteak baina dirurik ez, eta erosketa atzeratzea erabaki zuten. Aurten ere dirurik izango ez den beldur da Elkorobarrutia; horregatik, basoen garbiketen gainean jardun gura du larreen arduradunarekin, Gatzagako basoak garbi zelan mantendu erabakitzeko. Pagoeder aldean, esaterako, sasi handienei sua emateko baimena eskatu gura dio. Ganaduarendako ere oso garrantzitsua dela basoa garbi egotea dio Elkorobarrutiak: "Zenbat eta hobeto egon, gure basoetan ganadua sartzeko eskaera gehiago jasoko ditugu".
Ganadua aterata
Aste bukaeran bukatu da ganadua basoetatik ateratzeko epea. Otsaileko azken egunean atera behar da derrigorrez belarra hazteko eta basoa suspertzeko eta berriro maiatzaren 1ean sartu –behiak, zaldiak eta ardiak–. Horretarako baimen eskaerak azaroan aurkeztu zituen Udalak eta orain baimen horien berri emango diete. Aurten, gainera, gatzagarrak ez diren abeltzainak ere interesatuta daude eta ikusi egin behar zenbatendako dagoen lekua.