Orain dela bi urte ere halaxe egin zuten; afaldu eta ondoren lekukoaren atzetik joan ziren orduan. Oraingoan, baina, ez dute halakorik egingo, bi egun aurreratzea erabaki dute-eta. Afaria apirilaren 3an izango da, egubakoitza, kultura etxean, eta 16. Korrikaren lekukoa apirilaren 5ean iritsiko da, domeka. Afalordua, gainera, bertsolariek girotuko diete gatzagarrei; Mañukorta bizkaitarra eta Jokin Labaien arrasatearra izango dituzte lagun. Afarira joateko izenemate epea astean bertan zabalduko dute. Labidea dendan hartuko dituzte izenak, eta Korrika batzordeko kideek herritar gehienak animatzea gurako lukete.
Kilometroak salgai
Bestalde, kilometroak erosteko aukera dago AEKri laguntzeko. Interesatuek Korrika batzordeko kideekin egin behar dute berba, eta argibide guztiak jasoko dituzte. Gatzagara azken egunean iritsiko da Korrika, apirilaren 5ean, 07:15 inguruan. Lau bat kilometro dagozkio herriari, eta, duela lau urte ez bezala, aldapan gora egin beharko dute takarradan herritarrek.